新思維民主思路否認合併

【明報專訊】噚日有傳媒報道，話「民主思路」同「新思維」將會喺下年1月合併做政黨，又話呢兩個行「第三條路」嘅政治組織合併，係「北京的意思」。不過，民主思路同新思維隨即發表聲明，話報道不符事實，兩個組織並無計劃或者討論過合併。


新思維召集人狄志遠（阿狄）形容報道係「作古仔」，話報道內容雖然詳細，但只係媒體嘅「憑空想像」，媒體亦無聯絡過新思維嘅核心成員，去確認合併消息嘅真偽；又話呢篇報道背後係咪有政治動機，仍然有待觀察。立法會新界東補選在即，新思維會唔會派人出選呢？阿狄話黨內現時討論緊，派唔派人出選會喺聖誕之後公布。


湯家驊發起嘅民主思路亦就報道發表聲明，話兩個組織有各自嘅目標同工作重點，民主思路無計劃或者討論過合併。


報道同時話阿狄曾經係民主思路理事會成員，喺籌組民主思路上有角色；民主思路就澄清，阿狄並唔係民主思路理事，亦無參與過理事會嘅工作。