蔣麗芸無到 民記逛工展消費力減

【明報專訊】今年零售業進入寒冬，連民建聯到工展會消費意欲都比過去幾年少咗好多。噚日適逢冬至，民建聯李慧琼（Starry）、譚耀宗、葉國謙、周浩鼎一行去到工展會買嘢。不過，佢哋兜兜轉轉咗七八個攤位，都淨係買咗啲零食，大部分時間都只睇唔買。Emily出發之前問過幾位，大家似乎都無咩明確目標。準備備戰新東補選嘅周浩鼎，就選購咗五六包兒童麵食畀歲半嘅囝囝，同埋買咗簡易熨斗畀工人。不過，民記消費力驟減，相信最大原因都係因最買得嘅蔣麗芸Ann姐，同黃定光象哥今年都齊齊缺席。


民建聯又幫襯咗特首梁振英早前曾試食過嘅Hello Kitty馬拉糕同流沙包點心攤位，Starry大讚點心造型可愛，唔捨得食，但身邊嘅葉國謙就一口吞咗落肚。


本土議題 青民話「唔陌生」

此外，趁住過節，青年民建聯成員噚日就同傳媒茶敘。講起近年社會熱議嘅「本土」議題，青民主席顏汶羽話，本土論述其實對民建聯唔陌生，因為2012年立法會選舉嗰陣，現任黨主席李慧琼已經主張「本地人優先」。不過此「本土」非彼「本土」，顏汶羽強調民建聯主張嘅本土唔係港獨；其餘黨友亦都話，佢哋所諗嘅「本土」，係負起對社區嘅責任，同埋唔會排他嘅。