葉劉自爆後生無人追 30歲初戀

【明報專訊】噚日初十五元宵佳節，新民黨主席葉劉淑儀就同傳媒自爆，自己後生時都無人追、無桃花運，而佢老公葉文浩係佢初戀情人，佢仲話當年都係親戚介紹「相睇」，大家先認識對方，然後拍咗半年拖就結婚喇。


葉太噚日同成班新民黨成員同傳媒聚會，仲分享自己嘅戀愛史，話佢30歲先識佢老公，31歲就結婚，當時嚟講已經好遲喇，佢自爆「成世人都無桃花運㗎，無拍過拖、無人date！」佢話讀大學時都有人約吓睇戲，但一兩次後就無下文，坦言自己可能太認真，「無男士同我去多過3次街」。


相睇唯一要求 對方讀過大學

出嚟做嘢葉太又掛住搏殺，到咗28、29歲，阿媽都為佢擔心，於是親戚幫佢搞相睇飲茶，兩人唯一要求係對方要讀過大學，最終認識咗大佢15年嘅老公，佢話飲完茶後都好驚無下文，但一星期後就收到葉生約佢去流浮山食海鮮，結果兩人一拍即合，拍拖半年就拉埋天窗。


至於新民黨副主席田北辰，噚日選擇同大家分享喜悅，皆因佢第三個外孫女早幾日出世，所以請大家食薑醋，又話今時今日有小朋友，除咗高興，都戥佢哋辛苦，1歲幾嘅小朋友，都已經要識得兩文三語咁回應自己叫乜嘢名。