信置豪宅承峰

【明報專訊】小琴細細個嘅時候，時常都會聽到爸爸媽媽講，最寫意既生活莫過於係「住洋樓、養番狗」；長大成人後，小琴家都算係住到洋樓，亦養咗隻英倫品種嘅短毛貓女（都可以話係番貓），但如果屋企擁有一個佔地廣闊、充滿英倫園藝風格嘅私家花園，就更加係人生一樂也！

英倫園藝風格 等同室內七成面積

噚日，小琴到咗大埔馬窩，參觀由信置（0083）發展嘅低密度豪宅「承峰」，最新對外開放嘅現樓示範單位（位於地面），內籠建築面積係2077方呎，屬4房（雙套房）間隔，但最令小琴留下深刻印象嘅，唔係有咁豪華得咁豪華嘅室內裝修，而係佔地1432方呎嘅私家前園（圖），設計師以英式園藝風格作主調，綠化又憩靜，真係好舒服。仲有，這個花園嘅面積係1400多方呎，大約等同室內建築面積嘅七成，都咪話唔誇張，而且仲係承峰各特色戶的花園面積之最。

聽代理朋友講，信置家正考慮以連全屋裝修、家具形式發售此單位，估計呎價分分鐘介乎1.5萬至2萬大元。計小琴話，如果購咗呢個單位，收樓時除咗可以即刻欣賞呢個花園嘅一樹一木外，仲可以約埋朋友搞一次小型花園派對。

（陳淑安攝）