匯控滬上市 冰雕露玄機？

【明報專訊】匯控（0005）進軍上海交易所國際板掛牌一直未有聲氣，連冰雕都露出玄機。噚日匯豐喺圓方開新嘅卓越理財中心，開幕儀式用上一座冰雕，由管理層注入紅酒，顯示出紅色嘅HSBC四個英文字咁，認真創新。可惜效果甩轆，代表上海（Shanghai）嘅S字窒住窒住，未能成功注入紅酒，唔通去上海掛牌真係阻滯重重？

「S」唔通 「H」得一半

小琴聽匯控講話返內地掛牌，大大話話都聽咗3年有多，不過一直遲遲無落實。匯控仲話已經做好晒一切準備工作，可惜阿爺無話得，就算有咩工作做咗都無計。至弊就係，今次冰雕唔止S通唔到，連代表香港（Hongkong）嘅H字都係得半滿。大家諗吓，代表上海嘅S已經通唔到啦，H代表香港先通得一半，就好似即係香港業務半桶水咁，匯豐話晒喺香港都係銀行界大哥大，所以話意頭認真麻麻。

業務重心地香港（H）同上海（S）都窒住窒住，負責倒酒嘅管理層，包括香港區總裁馬凱博、香港區個人理財業務主管麥倩華即時頭都大埋，身為女將嘅麥倩華，仲即刻忍唔住幫倒S字嘅老細馬凱博解圍，親自用手指想篤穿個冰雕，可惜都係無功而還！

報料電郵﹕piano@mingpao.com