新聞類別
財經
詳情#
【明報專訊】國際資源（1051）自從舊年搵前恒生大班柯清輝入局以嚟，市場關注度迅速提升，姑勿論柯大俠對國源實質業務有幾幫得手，淨係對提升公司知名度已經應記一功。國際資源噚日開記者會，作為副主席嘅柯大俠都有列席，但全程冇乜點出聲，直至有記者指明要問柯大俠對公司前景嘅睇法，先令大俠開「金口」。
不過，柯大俠唔講嘢就由自可，一開口講國際資源秀麗前景嘅時候，身後印住公司名及標誌嘅布景板突然冧咗落嚟，好在冇砸親一眾管理層，但場面就有啲尷尬。不過見慣大場面嘅柯大俠依然從容不迫，繼續侃侃而談。
趙渡加人工 都要問過柯大俠
柯大俠話，公司家首要目標係令旗下印尼金礦Martabe喺明年底前產金，因為呢個金礦一日唔產金，公司股價一日都唔可以反映到真實價值。柯大俠仲話，Martabe初步預計可年產黃金25萬盎司，但應該有潛力增加產量，因為投產礦區佔整個礦區面積只得5%。
除咗柯大俠，主席趙渡都算係財經界名人，噚日有記者問佢做乜唔支薪，佢就話Martabe原定今年第3季投產，但年初印尼一場巨雨，令Martabe投產時間表押後，趙渡覺得自己身為主席需要為事件負責，所以決定喺Martabe投產前唔會支薪。跟住記者問佢Martabe產金之後，趙渡會否加自己人工，趙渡就話呢個問題，要問柯大俠，因為柯大俠至係公司嘅薪酬委員會主席喎！
報料電郵﹕piano@mingpao.com
回應 (0)
