王冬勝 捱過10個金融風暴

【明報專訊】正所謂十年人事幾番新，匯豐銀行亞太區行政總裁王冬勝踏足銀行界30年，原來大大話話都經歷咗接近10個金融風暴，聽落去認真嚇死人，但其實所有80後都置身喺其中，大家都係由一個浪捱過另一個浪！

王冬勝娓娓道來呢30年香港金融界經歷過嘅風風雨雨，包括81年息口扯高到20幾厘、83年中英談判期間港紙大貶值、87年股災，91年又到銀行擠提，97年同98年亞洲金融風暴，之後到2000年科網股爆破，03年SARS又搞到本港經濟蕭條，香港樓價由1998年至2003年跌咗差不多七成，最近由08年次按引起一連串嘅金融海嘯，總知就係鑊鑊新鮮鑊鑊金。

港人笑對風雨 雷曼事件例外

王冬勝話，整體香港對市場上落嘅反應算係比較成熟，輸錢都唔會話要問政府攞返錢，但都不忘提番一句，話除咗雷曼事件外。今時今日仲有好多雷曼投資者不滿或不合資格賠償，喺中環各大銀行分行示威，匯豐總行亦不能倖免，最近仲有一批內地投資者持續拉橫額同「播哀樂」抗議，又難怪王冬勝要強調雷曼係特別例子嘅！