青姐言論惹火 雷曼事主直搗有線

【明報專訊】中環各大銀行一直係雷曼事主駐紮打鑼打鼓抗議嘅大本營，但噚日就連有線電視喺會德豐大廈嘅直播室都成為圍堵目標，點解？之唔係股評人胡孟青（青姐）前兩日無端端喺有線直播財經節目上，話班雷曼事主係「每人收200元」的職業Fans，辣㷫班事主囉。啲事主不滿畀人屈，抹黑佢地2年零3個月嘅長期鬥爭，聲言青姐唔道歉會再有行動。

話說星期三下晝4、5點嘅時間，證監會行政總裁韋奕禮突然宣布辭職，當時做緊有線直播財經節目的青姐，首先爆咗一句「會唔會呢排好煩躁？」之後就食住上話雷曼事主日日喺中環銀行一帶「日日紙紮公仔、鈴鈴查查」，搞到人心都煩。

指收錢示威係抹黑 要求道歉

同佢拍檔嘅記者隨便回應﹕「又係喎，逼到佢癲咗？」點知青姐就愈講愈大﹕「你唔知嗰班係職業Fans，200蚊per head㗎（每人收200元）」記者追問﹕「係咩？職業Fans嚟咩？」

青姐之後就笑笑口話係「聽聞係啦」，然後繼續話中環遮打大廈（即證監會總部所在）9個門口都畀雷曼事主封殺晒，上班族日日返工要搵路走，搞到無晒心機，「日日喺公司樓下同你打齋喎！」

其實青姐講講吓，記者已經開始意識到唔係咁對路，想兜番話韋奕禮「可能」頂唔順唔出奇，仲話「我哋自己講啫」，點知青姐愈講愈肉緊：「最慘頭先見到有個職業Fans喺度打打吓查查呆咗，有個警察走埋去叫佢起身」。呢啲精彩對話，雷曼事主大聯盟已經上載到youtube：http://www.youtube.com。

佢地仲已經電郵咗封投訴信去廣管局、香港記者協會、有線電視同埋行政長官及各立法會議員