九把刀高調同周亭羽拍拖連體嬰玩電話

【蘋果日報】現年39歲嘅台灣導演兼作家九把刀早年憑電影《那些年，我們一起追的女孩》成名，《那些年》曾一度成喺香港電影史上華語片票房冠軍。之後佢唔少作品好似《殺手歐陽盆栽》、《等一個人咖啡》同《樓下的房客》等都改編成電影，不過被踢爆同前中視主播周亭羽劈腿開房，同10年感情嘅女友小內最終分手收場，令九把刀形象一度急挫。


之前拍《那些年》已被批有「消費舊愛」之嫌，後又背住拍拖10年女友偷情，但九把刀最後都係選擇同周亭羽一齊，去年兩人晚餐約會後，前後離開餐廳，點知周亭羽腳痕，彎腰抓右小腿止癢，九把刀見狀，即刻拎杯飲料上前，同女友行去暗角之後，當街蹲下為佢洗腳，洗完右腳又洗左腳，果然係真愛。


有指九把刀同周亭羽本打算結婚，但傳男方母親唔接受周，婚事延宕，九把刀否認。


早前九把刀自編自導嘅電影《報告老師！怪怪怪怪物！》上映嚟咗香港宣傳，原來同行仲有周亭羽。本報讀者多多早前透過爆相爆片，話日前喺尖沙嘴海港城見到佢哋兩個喺Food Mall撐枱腳，多多表示當日4點一去到Food Mall就見到九把刀同女友已經喺度食飯，讀者稱：「佢哋都食咗一段時間，九把刀叫咗個燒臘飯，佢女朋友好似食泰國炒粉絲，女仔仲會餵男仔食嘢，都幾親暱。原本佢哋打對面坐各自玩電話，後來佢女友行過去畀電話九把刀睇，跟住順手坐咗喺隔籬。」


據多多講喺食堂入面冇乜人認得九把刀身份，佢亦都難得自在喺度玩電話，有時就同身旁嘅女朋友調笑。食完飯周亭羽買咗一個甜品兩人共享，坐足一個鐘至肯走。多多話見到九把刀同女友叫嘅飯餸都唔係好貴，40、50蚊就有交易。