新聞類別
娛樂
詳情#
【蘋果日報】【我們的演唱會】現年52歲的劉美君將於下月假紅館開騷，請到28年前跟她合唱《偷窺》的林保怡出山開金口，日前兩人大爆當年合作秘密，劉美君對「新人」林保怡未出街的《偷窺》一聽鍾情，劉美君硬插要合唱，笑言自己不知醜：「我覺得如果我同佢唱咪仲好聽。」
採訪：余燕儀、懷鈺
化妝：Kris Wong（劉美君）、Dera Tse（林保怡）
髮型：Gary Sun@Hair Corner
場地提供：Spark Bar& Restaurant
劉美君入行31年，推出過多張唱片，但只跟林保怡有合唱歌，日前兩人在中環接受《蘋果》專訪，重演《偷窺》MV在酒吧「扮成不看你，但偷窺熱情射向你」經典一幕。九年沒開騷的劉美君，下月再踏紅館舉行「千色演唱會」，請到退隱樂壇的林保怡出山做嘉賓，她說：「我諗唔到有第二個男歌手可以同我唱，佢係取替唔到，我唔係客氣，因為佢把聲線係好難遇到。」
合唱有遐想
林保怡認為合作是緣份：「本身首歌係英文歌，我將佢降低四個key去唱，用低沉啲聲去表達係好舒服，點不知你將佢變成經典。當時嘅劉美君紅得好緊要，我未出碟係新人，佢話要聽我嘅歌，聽晒十首揀咗《偷窺》話要唱，我當然好開心。」劉美君笑說：「我係欣賞㗎，覺得如果我同佢唱咪仲好聽，不知醜地，哈哈！」
當年MV在酒吧拍攝，劉美君勾起回憶：「以前大家好純，依家大個更深層次更懂挑逗。我覺得同你唱歌嘅時候，係令人有個遐想。」問到林保怡企上紅館舞台有否信心？他淡定說：「我依家去到一個地步，進化到另一種動力。」劉美君更力撐：「我好仰慕佢，佢真係藝術家，唱歌感情有藝術家一面，聲線係錢買唔到嘅嘢，唔係咁多男仔唱到佢嘅key又出到聲，好多男歌手冇低音，好多女歌手都係唱高音叻，去唔到低音，呢樣係我同佢可以好黐得埋。」保怡笑說：「好多藝術家都好窮，好彩你搵我唱一唱。」
「情婦都係人」
問到鍾意劉美君哪首歌？林保怡陶醉地哼唱：「Jay，一張醉面儍痴痴」（《午夜情》）、「放低，讓你把身體放低」（《最後一夜》）。而下月就開騷的劉美君，心情好興奮：「有十個時代背景，穿插現代、古裝，成件事連轉妝造型，要有一番設計，全部嘢我唔會離開台，呢個好創新，如果話冇壓力係呃你，不過我份人好得意，越難做越興奮，你叫我淨係做演唱會都覺得悶，我希望係用腦去諗創意，唔係用錢做嘅嘢，希望20年後睇番轉頭，我哋做過呢樣新嘢，不枉癲得咁辛苦。」
劉美君的歌曲一直好踩界，偏向風情、性愛，她說：「當時女歌手出嚟，梗係唱白雪公主愛情故事離唔開初戀，我都結咗婚，初乜戀啫，仔都有個，我唔care係咪做少女，只係care有冇將實質社會存在嘅嘢擺喺題材上，即係唔好咁虛假，點解你哋只係唱白雪公主，冇人唱吓舞小姐、情婦，佢哋都係人。」
回應 (0)
