陳法蓉重提1989年「臥底港姐」朱潔儀：聽過傳聞

【蘋果日報】外國套《選美俏臥底》就講女警探化身臥底潛伏喺美國小姐選美當中，同罪犯鬥智鬥勇，原來香港都有「選美俏臥底」，不過形式就好唔同。今屆港姐雷莊兒當選冠軍，引起非議，好多人都想知係點選出嚟，之不過選美幕後過程一向係保密……


近日陳法蓉喺周刊報道中，同1993年港姐冠軍莫可欣接受訪問，二人回憶起參選過程，陳法蓉就爆當年參選有「選美俏臥底」，周刊會派一個女仔嘅去報名，陳法蓉喺報道中直言唔係俾錢請人打工，而係佢哋會俾錢幫個女仔打扮，又教化妝同儀態，希望個女仔可以順利入圍。


就此事，《蘋果》都問過朱潔儀，佢透過whatsApp回覆：「好似聽過傳聞，但忘記係邊個。」問到同屆季軍梁佩瑚想問知唔知真係有「臥底」存在，有冇遇過呢？梁佩瑚就以短訊回覆：「冇聽過，亦冇感覺遇到。」


此外，查小欣都曾經喺昔日報道講過喺周刊年代，選美獨家料係銷量保證，有一年試過搵人扮工作人員，去後台影相，因為事件曝光，第二年，電視台加強保安，惟有派出「臥底港姐」。1989年港姐冠軍陳法蓉亦有唔少是非，早年陳法蓉與同屆港姐季軍梁佩瑚傳不和，又指佢同翁為德當年係人前扮好友，最近又同1990年港姐季軍梁小冰喺出騷前吵大鑊(新聞連結：http://bit.ly/2f1jaUv)，不過陳法蓉就獲好友蔡少芬及洪欣力撐，件事後來不了了之。