澳門小姐顏值高麥嘉欣出戰國際小姐對撼香港代表

【蘋果日報】剛出爐嘅香港小姐冠軍雷莊兒(Juliette)，受到好多網民嘅非議，有網民批評佢嘅笑容太大，話佢似哨牙珍，但賽果已定，Juliette亦講明唔會嘥時間去睇網上兄嘅留言，因為佢已經係勝利者。 Juliette就話自己唔會理會，但網民就一於少理，繼續發掘新題材，有網民就搵到香港嘅鄰居澳門小姐麥嘉欣（Sofia Pavia），Sofia將到日本東京代表澳門參加國際小姐（Miss International）。咁網民就大讚呢位嘉欣靚爆鏡，比起今屆港姐冠軍Juliette更有美貌。 但網民都睇漏咗，其實代表香港參加2017年國際小姐嘅王詠珩(Wing)都好有睇頭㗎，Wing於今年7月，參加由「澳門選美連盟」嘅甄選，擊敗14名對手而選出嘅香港代表。Wing現年23歲，身高5呎8吋半，一年前喺英國大學畢業，主修傳理學，其後回流返香港做模特兒。而佢同澳門代表Sofia，將於11月14日到日本東京參加國際小姐競選。 Wing喺英國讀完書後，回流返港做模特兒，曾經拍過7-11同家鄉雞嘅廣告，是沙律(張沛樂)同Lillian Kan(簡幗儀)嘅師妹。驟眼望落，Wing就有啲似10優港姐冠軍麥明詩㖭，而佢喺個人ig亦不避嫌咁上載同男友嘅溫馨合照。 香港三甲冇得揀，呢兩位出戰國際選美嘅澳門代表同香港代表，你又會點揀？ 查實過往香港小姐嘅三甲，都會被安排出外參加國際性嘅選美比賽，好似冠軍將被委派參加環球小姐、亞軍將參加世界小姐，而季軍則會參加國際小姐。講到最勁嘅冠軍，當然要數到87年嘅港姐冠軍楊寶玲，參加1988年球小姐競選時就奪得第五名，同年佢參加世界小姐更勇奪亞洲皇后。然而自2001年，美國環球小姐大會要求無綫將「香港小姐競選」易名為「環球香港小姐競選」，否則不能參選環姐，但大台拒紀改名，所以自01年就冇再派香港小姐冠軍出賽環球小姐。 除咗楊寶玲揚威海外，87年港姐季軍林穎嫺出戰國際小姐時，亦奪得最上鏡小姐，而多名港姐季軍出戰國際小姐時，都贏得友誼小姐，包括胡家惠、朱慧敏、符思思、呂慧敏及王君馨等。但自15年，無綫已停止派港姐參加世界小姐同國際小姐。目前只會派港軍冠軍參加國際中華小姐，過往多年港姐冠軍同時勇奪中華小姐躋身三甲，而李嘉欣、郭羡妮、陳凱琳更是雙料冠軍。所以今屆港姐冠軍Juliette亦只能代表香港出戰國際中華小姐，能唔能夠得獎，就真係要睇下佳麗們嘅質素喇！