《同盟》Rainman謎底解開江美儀火併鮑姐

【蘋果日報】鮑起靜過檔大台嘅第一部電視劇《同盟》將會喺下個星期三播映大結局，近排啲劇集好鍾意玩big boss，喺《城寨英雄》播映結局篇嗰陣，已經掀起咗一陣猜猜Big Boss嘅熱潮，所以今次都唔例外，當《同盟》進入結局篇時候，藉住選舉活動，開始舖出伏線，原來背後有一個幕後黑手Rainman，操控大局，令以鮑姐為首嘅令氏集團，陷入困境。


監製Jazz曾經預告過，Rainman係由一個有份量嘅演員上陣，喺前晚播映嘅第23集，鄭子誠本來唆擺張國強殺死鮑姐，先可以抬起頭做人，點知原來為局中局，張國強炸死咗之後，矛頭直指鮑姐，於是乎保安局決定召開小組，希望徹查真相，飾演警務處副處長嘅羅樂林同飾演滅罪委員會主席嘅江美儀現身，Rainman嫌疑人登場。


其實喺討論區上，唔少網民都開帖估Rainman嘅真身，除咗羅樂林同江美儀之外，亦有人覺得呢個人係飾演警司嘅劉江，甚至係張國強個仔林子善。今晚呢個謎底正式揭盅！話說飽受喪子之痛嘅郭鋒，本來同鮑姐對立，但係最後為咗姚子羚，同鮑姐冰釋前嫌，希望查出邊個係Rainman，表面上佢不惜殺陳山聰以示誠意，佢仲喺蛛絲馬跡上，發現Rainman嘅真正身份，原來就係江美儀，可惜最後招致殺身之禍，臨前死佢都留低線索，俾陳山聰佢哋追查。