幸福後必定出事《踩過界》朱千雪被鎗殺

【蘋果日報】《踩過界》好快就會大結局，而劇情都推進到白熱化嘅階段，前晚播出嗰一集就好有睇頭喇。先係張振朗同李佳芯嘅感情線，李佳芯再一次接受番張振朗，但大家都知，喺大台嘅劇入面，越幸福就越會出事。
另一個幸福嘅就係王浩信喇，呢集講朱千雪幫佢做手術，終於可以睇返喇，朱千雪仲好冧咁話王浩信一開眼就見到佢，不過都係嗰句，喺大台嘅劇入面，越幸福就越會出事。
出事就係單立文約咗張振朗去貨倉，之後朱千雪就知道咗，跟埋一齊去，而王浩信就最後一個到，張振朗去到貨倉就見到單立文想殺佢，兩個打咗一輪之後，張振朗搶咗單立文把鎗，企咗喺轉角位等單立文出嚟，當張振朗聽到人聲，轉身出嚟開鎗。
對眼得番嘢嘅王浩信，去到現場見到朱千雪死咗，張振朗同單立文都暈低咗，情緒即時崩潰，爆喊，仲埋怨自己點解要收埋自己。
其實今集王浩信有兩個演技大爆發嘅位，第一個就係佢開番眼之後睇到嘢嘅笑容，呢個笑容唔係咁易演，要做到盲人睇到嘢之後嘅情感，真係唔簡單，睇完開心演技就到睇傷心嘅演技，嗰種有得到世界再失去世界嘅情緒，王浩信都做得好好。