【馮仁昭四圍超】李彩華開騷　想唱舊愛林峯

【蘋果日報】李彩華（Rain）出道17年，初時做模特兒，之後出過幾張唱片，後來為屋企人抵債，決定北上努力搵錢。經過咁多年嘅辛勞，佢終於成為小富婆，更決定喺下月27號於旺角麥花臣開一場叫「十月的雨」嘅紀念演唱會。
噚日Rain喺尖沙嘴出席演唱會記招，佢着住黑色bra top魚網衫，再襯黑色皮褲。佢話自己咁多年天生麗質，都係冇做運動，但係因為演唱會，佢開始要做運動，但又怕腳粗。問Rain會唔會揀舊男友林峯嘅歌，佢話：「可以考慮，佢都有好多快歌，其實對自己首個演唱會都會好緊張，我會唱啲大家耳熟能詳嘅歌，大家都會聽得好開心。」
被指變樣唔上心
Rain之前上TVB節目唱歌，有網民話佢個樣唔同咗，問佢有冇唔開心？佢話冇：「我唔會上心，起碼佢哋睇晒我幾分鐘表演，我睇番啲內地劇，紮晒孖辮，梳齊蔭唔似我，最緊要自己relax，我自己好正面，所以自殺、抑鬱，同我完全冇關係，我唔會諗呢啲野。」
撰文：馮仁昭