周文耀引蘇詞嘆「吹水易 做事難」

【明報專訊】退休後做什麼因人而異，有人選擇「冷河」剛過即飛身服務大財團，展開富貴事業第二章，有人選擇真正放下名利，閒時作育英才思考人生。港交所（0388）前行政總裁周文耀，好明顯屬於後者。

不明為何多港人評論金融

港大畢業的周文耀，噚日以傑出校友身分返回母校，與過百名港大師弟妹分享做人道理。周總讀工程出身，但文學根底唔弱，佢以北宋大文豪蘇軾嘅詞句「論事易，作事難；作事易，成事難」概括佢嘅處世宗旨，翻譯返俗語即是「吹水」容易做事難，做事要做得好就難上加難。呢句至理名言小琴都好認同，奈何放在「浮面」嘅香港，吹水吹出遠大前程嘅大有人在，腳踏實地升官發財嘅就買少見少。周總可能都發現到呢個深層次矛盾，尤其喺金融界，所以佢噚日都打趣咁話香港好奇怪，唔明點解咁多人敢於走出來做專家評論金融大勢，當中當然有誠意可嘉之士，窮一生專注研究個別類型股份，但亦有人「瞇埋雙眼」放飛標式地評論股價。

與學生交流，難免被問到滬港之爭，周總話任何系統硬件都容易被後來者追上，但說到香港嘅自由、尊重法治嘅社會文化，卻非短時間可以被取代，所以佢對香港嘅前景好有信心。咁又係，起碼小琴喺香港食錯嘢，大可放心去投訴，唔使驚畀人拉去坐監，呢方面確係香港值得自豪同珍惜嘅地方。