新聞類別
娛樂
詳情#
【蘋果日報】韓國電影《逆權司機》嘅的士大佬感情鬼咁好，富有正義感，甘願冒生命危險接載傷者去醫院。而上兩集《仙遊首爾》遇到嘅的士司機一樣鬼咁友善，鬼咁好傾，不過動主播阿仙都聽聞，有人喺首爾搭到「黑的」！
韓國人妻白小姐話真係試過夜晚搭中「黑的」，「我上車就問司機係咪按錶收費，司機話係，點知個咪錶係不停...跳得好快！真係跳到個心都跳出嚟咁濟！」佢話平時搭都係3萬幾4萬韓圜，嗰次竟然跳錶跳過10萬韓圜！白小姐於是求的士司機收平啲，最終都收咗7萬韓圜。
香港人李先生因為工作喺首爾住過，佢話試過有的士司機拒載，「我喺反方向上車，司機好似鬧我咁，叫我去返對面上車，其實橫掂我都會畀錢，U Turn唔緊要，我唔明點解。」香港人陳小姐都話聽過，「有啲司機會博你係遊客，唔撳錶。」
對於無理收費、拒載、兜路等，莫講話遊客，韓國人都話試過。韓國人徐先生話自己唔係係首爾人，「我唔熟首爾啲路，試過有司機一直兜同一條路。」金小姐話有啲司機知道短途唔載，就算載都好不滿。姜先生話試過夜晚搭的士，啲司機會鎖車門，要問咗去邊先，唔係心目中想去嘅地方就唔開門。
遇到呢啲鬼咁谷氣嘅情況，韓國人就教路，姜先生話的士前面有司機資料，可以用手機影低，影埋車牌，向的士公司投訴。的士大佬金司機話，「乘客嘅目的地喺首爾市內，係唔可以拒載，司機會犯法，如果有客人投訴，會罰款20萬韓圜(約$1400)。」
當然，拒載係故意，但有時候真係溝通唔到。嚟自台灣嘅廖小姐就話，「大部份司機都係老先生，唔識英文，佢哋問一問之後就話『NO! NO! NO!』，就開走喇！」金司機解釋，「我已經80歲喇！真係唔懂英文，如果客人話去Seoul Station，呢啲似韓文嘅咪知係首爾站囉！」
其實首爾的士多數裝有GPS，如果事前預備韓文地址，或學一點基本韓文，溝通會順利得多。的士大佬夏司機話，有啲客人識少少韓文，會識講「向前」、「右轉」畀指示佢。
的士大佬有好有壞，遊客都一樣，金司機話載中國遊客最辛苦，點解呢？請睇片。
《仙遊首爾》重溫：
http://hk.apple.nextmedia.com/enews/animation/kfans/
記者：阿仙
繙譯：Regine
攝影：峰
編審：Kaman
韓國人妻白小姐話真係試過夜晚搭中「黑的」，「我上車就問司機係咪按錶收費，司機話係，點知個咪錶係不停...跳得好快！真係跳到個心都跳出嚟咁濟！」佢話平時搭都係3萬幾4萬韓圜，嗰次竟然跳錶跳過10萬韓圜！白小姐於是求的士司機收平啲，最終都收咗7萬韓圜。
香港人李先生因為工作喺首爾住過，佢話試過有的士司機拒載，「我喺反方向上車，司機好似鬧我咁，叫我去返對面上車，其實橫掂我都會畀錢，U Turn唔緊要，我唔明點解。」香港人陳小姐都話聽過，「有啲司機會博你係遊客，唔撳錶。」
對於無理收費、拒載、兜路等，莫講話遊客，韓國人都話試過。韓國人徐先生話自己唔係係首爾人，「我唔熟首爾啲路，試過有司機一直兜同一條路。」金小姐話有啲司機知道短途唔載，就算載都好不滿。姜先生話試過夜晚搭的士，啲司機會鎖車門，要問咗去邊先，唔係心目中想去嘅地方就唔開門。
遇到呢啲鬼咁谷氣嘅情況，韓國人就教路，姜先生話的士前面有司機資料，可以用手機影低，影埋車牌，向的士公司投訴。的士大佬金司機話，「乘客嘅目的地喺首爾市內，係唔可以拒載，司機會犯法，如果有客人投訴，會罰款20萬韓圜(約$1400)。」
當然，拒載係故意，但有時候真係溝通唔到。嚟自台灣嘅廖小姐就話，「大部份司機都係老先生，唔識英文，佢哋問一問之後就話『NO! NO! NO!』，就開走喇！」金司機解釋，「我已經80歲喇！真係唔懂英文，如果客人話去Seoul Station，呢啲似韓文嘅咪知係首爾站囉！」
其實首爾的士多數裝有GPS，如果事前預備韓文地址，或學一點基本韓文，溝通會順利得多。的士大佬夏司機話，有啲客人識少少韓文，會識講「向前」、「右轉」畀指示佢。
的士大佬有好有壞，遊客都一樣，金司機話載中國遊客最辛苦，點解呢？請睇片。
《仙遊首爾》重溫：
http://hk.apple.nextmedia.com/enews/animation/kfans/
記者：阿仙
繙譯：Regine
攝影：峰
編審：Kaman
回應 (0)
