蘇麗珊靠學生妹做女神同游學修分手現羅生門

【蘋果日報】蘇麗珊拍完《哪一天我們會飛》就同游學修戲假情真，但僅僅承認拍拖10個月，游學修就慘被分手。
事情發展是咁的。
蘇麗珊同游學修當年馬不低蹄宣傳《哪》片撻着愛苗，游學修最初被問到係咪拍拖，游學修嘅說法係「話唔到事」，之後先由蘇麗珊親口承認「發展中」。
關係公開咗，親密照可以見光喇，「閃光彈」包括有頭貼頭合照、搭膊頭chok pose合照、蹺手行金像獎紅氈、小背心蘇麗珊同赤裸上身游學修行山等等。
不過快樂變絕望，游學修喺ig宣佈「突然地收分手的惡耗」，又話想保護女仔一直都唔想提。隔咗一日，蘇麗珊道出另一個版本，指兩人係性格不合而分手，不涉及第三者，分手決定係「經過溝通後成共識」。
事情發展連《哪》片導演黃修平都覺得突然，因為分手消息傳出前無耐先同兩個人打過邊爐。亦因為咁，蘇麗珊女神形象消失咗，變番一個有血有肉嘅普通女仔。