【馮仁昭四圍超】栢芝家庭樂Quintus甩牙好得意

【蘋果日報】張栢芝早前因為放咗張同男性友人合照嘅相上Ig，有傳媒報道話佢有新男友登場，搞到栢芝嬲到清空晒Ig，仲將個Ig設定為私密賬號，大家以為佢從此會離開社交網絡。直至前幾日，栢芝先重新開通番Ig，仲繼續po相。不過今次就唔係貼其他異性友人嘅相，而係佢同兩個囝囝嘅旅遊相。
行街食自助餐
戴住cap帽、一身casual look打扮嘅栢芝，早前帶住兩個仔Lucas同Quintus一齊去行街，兩個仔大晒chok爆表情同甫士，相中見到Quintus開始甩牙仔，而同行仲有栢芝細佬豪龍同兩個小妹妹。栢芝就喺Ig晒出一組合照，寫住：「今晚去吃自助餐。」有得玩有得食，節目咁豐富，難怪班小朋友笑得咁開心。而照片中，佢兩個仔同姪女嘅造型比較，應該係Lucas比較識搶鏡。
其實，栢芝真係好錫兩個仔，成日見到佢帶住囝囝四圍去玩，不過帶佢哋去玩之餘，都要記住要畀兩個囝囝好好讀書，咁樣大個咗先可以成材呀！
撰文：馮仁昭