人妻Kay湊仔女生活愜意有望復工拍廣告

【蘋果日報】謝安琪上年開完演唱會，就宣佈暫別樂壇，計劃展開人生另一個十年。呢個十年大計啱啱開始無耐，人妻Kay就宣佈為老公張繼聰追多個女，兩人囡囡張靖（Karina）喺今年3月出世，呢段時間，Kay唔係無所事事，成日都趁有時間，就湊住阿仔張瞻同Karina四圍走。
從事歌手生活咁多年，Kay回歸平淡，真係好珍惜呢段時光，多咗好多好多家庭照。好似上個星期中秋節，Kay就湊住Karina出席屋苑舉行嘅迎月晚會。
對女性嚟講，有種幸福叫肥。早前Kay同生煎包王子蕭潤邦嘅新店開張，Kay講咗句：「o依家咁肥，仲唱乜歌？」唔好誤會，佢嘅意思唔係話肥人唔唱得歌，而係o依家唔喺狀態，同理想差一大段距離，o依家享受家庭生活之餘，都想慢慢咁回復狀態，俾個最好嘅Kay大家睇。
要等幾耐呢？或者，好快就有得見面。
早前Kay向傳媒放風，話成日都有好多工作邀請聯絡佢，報酬甚至比生囡囡之前更高，加加埋埋唔見咗過百萬，Kay仲話可以考慮下復工拍廣告，但就要等多一、兩個月左右。