拎99支玫瑰跪地求婚李天翔「整喊」富家女友

【蘋果日報】被大台定型做「御用強姦犯」兼認字特警嘅李天翔，早前被《蘋果》率先踢爆入紙同拍拖6年嘅圈外女友譚寶怡(BoBo)結婚。
原來天翔一直未同未婚妻求婚，最近忙拍劇集《果欄中的江湖大嫂》，前日專登向劇組請假，抽空搞咗個驚喜求婚派對，好友鄭世豪、陳少邦、黃嘉樂等都有出席。李天翔拎住99支玫瑰花跪地求婚，佢同未婚妻都感動到眼濕濕。
天翔昨日接受傳媒訪問時，坦言籌備得好倉卒，佢話：「因為最近日日都要開工好忙，但又好想做呢樣嘢，真係要同公司度期做求婚儀式。咁我都專登book咗個場地，約理我同佢嘅一啲好朋友，一齊見證呢個時刻，太太一路都唔知，係夾埋大家俾驚喜佢。」
有指李天翔女友係位富家女，平時有投資房地產，試過轉賣凱旋門一次便賺過千萬，問到結婚會唔會大搞？天翔話：「之前講過會低調，唔會擺酒。」