要健康唔要錢　謝安琪圓碌碌

【蘋果日報】【爆相爆片】人妻謝安琪（Kay）現年40歲，幫老公張繼聰生咗一對仔女，囡囡張靖（Karina）今年3月出世，產後停工半年嘅Kay暫冇復出大計，有指佢呢段時間推咗嘅商演同廣告，酬金總數約七位數，Kay諗起都話肉赤。


Kay雖然賺少咗，但就多咗時間陪仔女。讀者陳小姐透過《蘋果》嘅「爆相爆片」，分享Kay日前喺大埔超級城帶囝囝張瞻買奶茶。產後未收身嘅Kay全身黑色打扮，仲着埋5吋黑色高踭鞋出動，明顯見到下身依然圓潤兼肉感十足，出道時嘅蛇腰消失得無影無蹤，只剩尖下巴。


陳小姐話當時見到Kay母子買完奶茶，仲喺門口玩自拍：「Kay有少少baby fat，佢同囝囝影咗大約兩、三分鐘，玩唔同角度，佢個仔都好乖，配合媽咪影相。」陳小姐仲話冇乜途人認出Kay，之後Kay見到有人眼望望，佢都微笑回應。