何廣沛差啲入隊天堂鳥踎足三年變五虎3.0

【蘋果日報】幾十年前，無綫有好多藝員，為咗有多啲特色，當時好鍾意將啲藝員分組，俾唔同稱謂佢哋，等人留下印象，其中劉德華、梁朝偉、苗僑偉、湯震業同黃日華就係「無綫五虎」。
隔咗十幾年，無綫五虎同魔法少女卡通片一樣會咗人，「新五虎」由古天樂、古巨基、劉愷威、吳家樂同何遠恆組成。又過咗十幾年，五虎嚟到3.0版，o依家嘅五虎，講你都未必信，除咗有黃子恆、何君誠，仲有吳業坤、張振朗同何廣沛。
所以話，無綫嘅藝員荒真係幾嚴重，唔係話五虎3.0唔睇得，而係啱啱上位無耐已經要孭重飛，承接呢個咁有份量嘅稱號。講番何廣沛，一直都係做緊「佈景版」，包括喺《獎門人》終極篇入面嗰啲助手角色，拍劇都係閒角同客串，今年嘭嘭聲上位，《親親我好媽》、《超時空男臣》等等老是常出現。
再講多少少，何廣沛做到五虎3.0，真係要同無綫講句多謝……原因係當年MK-POP天堂鳥組軍，天堂鳥成員Lincoln同何廣沛因為相識，諗住叫埋佢入隊，點知過到天堂鳥經理人但過唔到無綫，結果等咗3年，何廣沛終於有機會上位。