小美糾纏13年終娶妻Chilam靚靚恩愛如昔

【蘋果日報】雖然話娛樂圈係花花世界，靚人多，誘惑更多，不過唔係個個藝人都係花心蘿蔔，都有專情種。好似喺香港圈中有名嘅恩愛夫妻張智霖（Chilam）同袁詠儀（靚靚），兩人2001結婚至今，不時行孖咇晒恩愛。兩人育有獨生子張慕童（Morton），雖然靚靚仍活躍於娛樂圈，但佢平日都花唔少時間嚟照顧囝囝。
至於台灣「不老男神」林志穎（小志）咁，同太太陳若儀低調地拍拖多年，終於2010年修成正果，註冊結婚，至今已先後誕下3個寶貝仔，包括已經8歲嘅Kimi，以及1歲幾大嘅孖仔Jenson同Kyson，其中Kimi更跟過爹哋小志上真人騷《爸爸去哪兒》，頗有人氣。
唔知同地理有冇關係，台灣好似特別多專情種，好似賀軍翔（小美）咁，今年6月喺毫無預警下宣佈已婚生女，佢嘅保護工夫做到足，只肯透露老婆係圈外人，據台灣傳媒報道，小美同太太喺初中年代已拍拖，拍拖4年後一度分手，但小美對其念念不忘，於是復合，兩人一直同居，亦是佢唯一承認嘅女友，兩人埋單計糾纏咗13年先正式拉埋天窗。
仲有一向低調處理感情事嘅何潤東，佢同太太林靜儀（Peggy）拍拖逾8年，就算被影到都唔公開承認，直至婚前一年（即2015年）先至公開拖手相，但都冇「東嫂」個樣睇。