明年退出娛樂圈？鍾嘉欣親自撰文澄清

【蘋果日報】鍾嘉欣同脊醫Jeremy結婚後，定居加拿大專心相夫教女。嘉欣一直都話唔捨得同囡囡分開，所以佢最近接演新劇《再創世紀》，劇組都要飛去溫哥華一個月拍外景，目的就係要遷就嘉欣。
有指嘉欣喺明年就同大台約滿，而佢亦有意等Kelly兩歲時，幫老公追多個，時間好似啱啱好，所以一直有傳聞指嘉欣約滿後就會退出娛樂圈，專心做少奶奶。
不過，嘉欣昨日就喺微博作出澄清，話冇啲咁嘅事，佢以英文留言﹕「有傳聞指我會退出幕前，但呢個唔係事實，我從來冇諗呢個問題，因為我仍然好熱愛我嘅工作，只不過我現在會將家庭放喺首位。」嘉欣仲話好多謝屋企人110%支持佢嘅工作，佢補充﹕「退休絕對唔係我嘅目標，最重要係開心同lovelovelove。」