趙哲妤抱B女撲奶粉

【蘋果日報】趙哲妤（Uny）去年9月宣佈未婚懷孕，去年底於吉隆坡工作時早產誕下囡囡「小魚」，跟母姓改名趙真羽。昨日是Uny的30歲生日，雖然女兒生父至今對她們不聞不問，Uny決心不求人，咬實牙關獨力養大囡囡。
Uny產後火速復出賺奶錢，每周必會安排時間湊小魚到灣仔返playgroup，日前3時許，Uny抱着十個月大、20磅重的囡囡放學，外傭隨後。三人原來周圍到藥房撲奶粉，還到屈臣氏買嬰兒用品，行了幾間才撲到兩罐奶粉，之後便到附近攞車回家。
特首林鄭月娥日前在施政報告提出檢討「限奶令」，Uny昨晚接受訪問時說：「點解要取消？囡囡每兩周飲一罐奶粉，次次有貨都要買定，即使取消『限奶令』，情況唔好差過依家就好。」Uny續說：「我乜嘢都諗咗囡囡先，希望政府提供多啲資源援助，我寧願搵少啲都要帶大囡囡，即使入不敷支，都要畀最好個女。」
生日P迎30
此外，Uny前晚撇B夜蒲，還約綠魔Karl、陳蕊蕊、囡囡大姨媽筱靖等開生日P迎接30歲，Uny講到生日願望，她說：「小朋友健康快樂係媽媽最大心願。」
採訪、攝影：陳杰、梁繼光、朱志聰