腳踏高踭鞋抱兩歲大仔官恩娜變「神奇女俠」

【蘋果日報】官恩娜（Ella）喺今年8月宣佈為混血醫生老公再度陀B，忙於安胎兼要照顧大仔BéBé G嘅Ella昨日喺Instagram貼新相，原來佢一家三口一齊去睇兒童音樂劇《Guess how much I love you》，Ella出發時仲拍片上IG，片中見到佢哋一家三口「化身」可愛動物，BéBé G仲不時搖頭，心情勁好。
後來Ella喺IG貼圖，並以英文留言：「帶BéBé G去看他的首套劇場音樂劇，完騷後剛好是他的午睡時間，他不讓我離開……媽媽抱我……媽媽抱我！他對我來說有點重，但我仍然很樂意抱他！」相中嘅Ella着住對高踭鞋，個肚都幾大，再要抱起一個兩歲人仔，其實都真係幾吃力，但世上幾乎所有媽咪都係「神奇女俠」，所以係難Ella唔到，只係旁人睇就好有啲危險咁啫。