女憑「澤」貴？梁洛施一片封后

【蘋果日報】杜汶澤演得食得導得，但，佢仲有一樣嘢好得，捧女得。
咪講笑，唔係話佢逢女必中，但經阿澤手捧紅嘅例子，實在唔少。除咗近日佢新請嘅Double May一上工即成話題人物，仲有曾經做過阿澤化妝師、其後正式轉戰幕前嘅陳意嵐。陳意嵐最出名係喺舊年上映嘅《選老頂》中，肉搏阿澤，成為話題，當年仲係「澤嫂」田蕊妮知道陳意嵐一心入行，推薦佢俾老公用。不過其實喺《選老頂》之前，陳意嵐已經參演過《同班同學》，又演過舞台劇，舊年更參加ViuTV選美節目《美選D.n.A》，後來陳意嵐正式簽約經理人公司，雖然唔係阿澤旗下，但陳意嵐成功上位，亦如願入娛樂圈。
而阿澤最成功捧紅嘅例子，必數梁洛施（Isabella），想當年Isabella只係英皇小花之一，但拍過阿澤有份監製兼合演嗰套《伊莎貝拉》之後，Isabella演技備受好評，佢更憑此片喺「第27屆葡萄牙波爾圖國際電影節」中獲得影后榮銜。
另外，憑住同阿澤合演《低俗喜劇》上位嘅陳靜（Da Da）亦係另一佳例，Da Da更憑片中「爆炸糖」一角彈出，人氣急升。後來Da Da憑《低俗喜劇》獲提名第49屆台灣金馬獎最佳女配角，翌年爆冷獲得香港第32屆香港電影金像獎最佳女配角；而阿澤後來喺《唐伯虎衝上雲霄》中，亦搵咗Da Da做女主角。
而喺同屆香港電影金像獎中，江若琳憑住同阿澤合演嘅《高舉‧愛》成功入圍逐影后，呢方面當然多得導演邱禮濤，但同江若琳合演嘅阿澤，功不可沒。
至於喺阿澤套自編自導自演新片《空手道》中參演嘅鄧麗欣（Stephy），由平日拍開嘅《愛》字系列、做失戀少女喊喊豬角色，一跳跳到做堅強打女，形象180度大轉變，Stephy亦有望憑此片擺脫其花瓶角色嘅「宿命」。