伯明翰誠哥：買咗8個人喇

【明報專訊】小琴身邊唔少男性朋友，都講緊呢排嘅Big Three大戰，但大家千祈唔好忘記，仲有香港人班主楊家誠嘅伯明翰（2309）都喺英超力拚。噚日伯明翰領導層，喺股東大會後見記者，有記者問佢地點睇球會表現，球會副主席彭彼德（Peter Pannu）講到明，可以踢得好啲。

伯明翰副主席：可以踢得好啲

咁1月會唔會買人呢？彭彼德就話，買人唔會好似曼城咁癲，至今已經用2400萬英鎊，何况之前都買咗唔少人，1月應該唔會大手買球員，一直唔多出聲嘅楊家誠，亦都開金口講﹕「都買咗8個人，都唔算少，買多3個，就買咗一隊波喇。」無他嘅，伯明翰依家聯賽排尾5，表現麻麻，最值得寄望係聯賽盃打入四強，可能楊生都同球迷一樣，有少少失落。

伯明翰係今個月初，向楊家誠買入重慶地皮，楊家誠噚日話，未來都會可能向伯明翰注入資產，亦有可能都會係房地產項目，希望令到球會嘅現金流更加健康。

聽首席執行官許浩略講，伯明翰喺3月會正式同特步（1368）開展合作計劃，透過特步商舖賣伯明翰產品，希望會反映在明年中期業績上。