曾情緒出現問題盧巧音匿屋企喪喊

【蘋果日報】盧巧音(Candy)早年同樂隊Kolor成員蘇浩才結婚，Candy曾經想生B，之但係最終都係想過二人世界，亦有一段時間冇出新歌，今個月18號係Candy生日，作為歌手，佢最大嘅禮物應該係嚟緊12月開個唱，大家有機會聽佢首經典歌《垃圾》、《好心分手》、《三角誌》，仲有個幾月就到開騷嘅日子，近日佢都四出宣傳。
Candy最近接受周刊訪問就話婚後忽然覺得壓力大，屋企大小事都係佢去做，情緒曾出現問題，有時喺屋企係咁喊，又會埋怨自己，老公遲返屋企都會覺得唔開心，Candy喺報道又指自己用咗差唔多兩年時間先好得番，好在老公一直支持佢，當Candy話想生B，老公都勸佢唔好為生先生，係要好好plan，佢又話因為年紀大，體力問題，o依家唔想生小朋友。
Candy又喺報道諗起2003年患甲狀腺病嘅經過，佢早年唱完《好心分手》後，首歌爆紅，Candy亦接咗唔少job，不過拍《暗花》MV嗰陣，佢忽然喺現場爆喊，佢喺報道中講當時成個人瘦晒，眼又有啲事，仲要甩頭髮，精神唔太好，開工都要靠戴假髮，剃咗光頭。之不過呢啲都過咗去，現時Candy生活得不知幾咁開心。