宋仲基變禿頭喬妹仲愛唔愛？

【蘋果日報】韓國神劇《太陽的後裔》嘅宋仲基同宋慧喬將於明日結婚，升呢做人夫人妻。
正當雙宋正籌備婚禮之際，近日微博用戶就搞搞新意思，將一眾男神、Oppa都變身做禿頭佬，然後問粉絲仲會唔會支持佢哋。當中連準新郎哥宋仲基都慘成為目標之一，該網民將宋仲基變成地中海，靚仔樣即時大打折扣，其他網民就指無論oppa變成點，佢哋都會撐到底，但係有網民就好奇一問，唔知喬妹見到宋仲基變成禿頭，仲會唔會繼續愛到底呢？
而其他慘被變成禿頭嘅oppa仲包括孔劉、李鍾碩、金在中、李光洙及G-DRAGON(GD)，當中網民就笑指光洙同金在中嘅地中海Look最無違和感。