【馮仁昭四圍超】專家Dickson唔召妓　陶傑阿芝幫破處

【蘋果日報】自稱冇拍過拖嘅「專家Dickson」，最近同陶傑及卓韻芝合作主持ViuTV節目《晚吹－啪啪Channel》，噚晚節目訪問咗「召妓達人」苦海哥，Dickson話自己32年來從未召妓，會繼續堅守下去。
買AV解決
早前三位主持喺柴灣接受本報訪問，Dickson話冇諗過召妓：「我嗰啲金錢買賣係建基於買AV，從來都冇呢方面嘅衝動！」阿芝問陶傑會唔會幫Dickson破處，陶傑就話：「我會盡男人義務同本份幫佢，佢咁樣係男人之恥！」阿芝又問Dickson係咪破唔到自己嘅恐懼，Dickson就話：「其實個人係會敏感咗，可能會行第一步，但係問題等同於你俾熱水淥過，下次見到杯熱水都會縮吓先。」
Dickson話對上一次追人係兩年前，但唔成功，本來阿芝有諗過介紹啲女仔朋友畀佢識，但冇理由害咗自己朋友，阿芝話：「怕佢破完一晚地獄之後，永恒都喺個地獄裏面，返唔到出嚟！我覺得佢應該試吓搵個ptgf（兼職女友），試吓喺愛情當中得到一點樂趣！」
撰文：馮仁昭