曾不幸小產郭羨妮望生多個

【蘋果日報】現年43歲嘅郭羨妮（Sonija），於2011年嫁俾大陸武指朱少杰，翌年即誕下長女Kylie。坐月期間已明言老公想追個仔、湊成好字嘅Sonija，於2014年一度再懷孕，當時仍未證實喜訊嘅佢，有傳為安胎辭演大台古裝新劇《無雙譜》，可惜BB無緣面世，Sonija過咗BB預產期先公佈呢個壞消息，佢話自己花咗啲時間去平伏心情。
雖然經歷小產傷痛，但Sonija未有氣餒，佢近年亦放聲氣表示想追多個B，雖然佢話仔女冇所謂，但就有漏口風想要個仔，湊成好字，而Sonija亦有透露，囡囡Kylie一度希望有細佬妹，及後怕對方會同自己爭凳仔，所以都係唔要，非常搞笑。
其實Sonija唔止試過為安胎推劇，其實自婚後佢都以家庭為重，尤其係喺囡囡出生後，更明顯減產，雖然佢仍有為港台等不同媒體拍劇及節目，亦有接拍廣告同商演等，但相對喺大台拍劇，工作量輕巧好多，亦冇咁困身，相信佢係一邊兼顧家庭，同步調理身子，準備迎接BB來臨。