《蘋果》FB Live跳唱草蜢搗亂　玩刀插頭

【蘋果日報】【今日ENT】草蜢「LIVE GOES ON」演唱會將於星期日開鑼，《蘋果》facebook專頁《娛果》直播節目《今日ENT》，前晚直闖排舞室搗亂，三子互幫對方玩萬聖節鬼馬造型，蘇志威（阿細）被扮到似「香港小姐」，蔡一傑就似「香港先生」，蔡一智刀插頭look最搞鬼爆笑。


之後草蜢接受跳舞大挑戰，阿細同智仔唱慢歌《永遠愛著你》，但就要跳勁舞《忘情森巴舞》，阿細跳咗兩下被考起。跟住輪到傑仔要跳《憑甚麼》唱《Lonely》，網友睇到狂派心心。


隔空咀嘴

講到三子識咗咁多年，有冇試過鬧交？智仔搞笑話：「我哋最近轉咗玩法，每日講50次I love you。」仲即席同阿細玩隔空咀嘴；問到有乜嘢不滿？蔡氏兄弟聯手玩阿細，爆阿細萬歲買提子，每人分得三粒。最後草蜢唱《夜性感》Halloween版跟女dancers激情互摸，傑仔話要大家睇到血脈沸騰。