冇腳雀仔終於停？林珊珊細女30歲前嫁崔建邦

【蘋果日報】Amigo去年初同野人撻着後，好快佢哋已經喺飛鵝山同居，今年7月有讀者更向《蘋果》爆相爆片，話見到佢哋兩個喺將軍澳廣場嘅吉野家買飯，男嘅排隊俾錢，之後再到隔鄰嘅吉之島買日用品同零食。佢哋只係喺吉野家買咗一盒飯兩份食，真係好甜蜜，但Amigo回覆傳媒時：「唉吔！咁我窮冇錢嘛，第二時有錢咪買多啲囉！」
雖然Amigo口中話自己窮，但昨日就有報道話原來佢哋已經有結婚計劃。報道入面仲講到野人身邊好友透露，於單親家庭長大嘅野人，並未因為咁而害怕婚姻，相反佢仲一直好想有自己嘅家庭，好想結婚生仔，而Amigo就捉到女方呢個心態，追野人時已經表明自己已經玩夠，好快野人仲應承同Amigo同居試婚。野人身邊好友仲話Amigo同佢哋講今次係認真嘅，因為野人俾到佢前所未有嘅感覺，認定野人就係佢嘅唯一，所以想喺野人30歲前就同佢結婚。
報道又話珊珊呢位「外母」，明顯唔係好鍾意未來女婿Amigo，就算拍拖年多，野人都唔會帶Amigo出席家庭聚會，相反家姐李澄(西瓜)就不時帶同DJ男友出席家庭聚會。珊珊當初見女大女世界，阻止唔到野人同Amigo拍拖，只希望時間可令阿女清楚了解Amigo，但佢想唔到阿女會同Amigo會有結婚打算，精明嘅珊珊惟有向佢身邊朋友下苦功，勸下野人唔好一時衝動做錯決定。