無綫男藝人拜狐仙？吳業坤求佛牌谷人氣

【蘋果日報】堪輿學家司徒法正日前喺ViuTV嘅節目《晚吹─總有一瓣喺左近》裡面，踢爆有一個無綫嘅男藝人拜狐仙催旺人氣，事後有指呢個男藝人係坤哥吳業坤，雖然事後坤哥否認呢件事，佢只係話「今次又係躺着也中槍，之前都中咗一次，希望唔好中第三次。」
之不過有周刊報道就指坤哥嘅密友爆料，查實坤哥喺未紅之前，喺一個幕後同事介紹下識咗司徒法正，嗰陣坤哥好尊重司徒法正，唔單止有約食飯，大時大節會致電兼禮到，而且好誠心去司徒法正嘅狐仙壇拜祭。報道又話坤哥除咗搵司徒法正之外，仲搵咗另外一個法科師傅Frankie幫手。
日前Frankie喺潘紹聰嘅網上節目話同一個結他男歌手有交情，結他男歌手籌備開演唱會，於是教佢拜神求咗個佛牌，結果令佢如願以償，跟住佢求咗一尊可以增強異性緣嘅佛版，雖然令佢異性緣多咗，本來師傅叫佢要多做善事，可是因為有人紅咗而疏遠，於是喺許願不還神嘅情況下，運氣變差。
事後周刊分別向司徒法正同Frankie求證，不過佢哋都唔願意開名。