過大海試手氣　柏豪肉緊賭錢

【蘋果日報】【爆相爆片】周柏豪日前喺澳門舉行巡唱，完騷後凌晨拉隊去威尼斯人賭場玩，同行仲有緋聞男女連詩雅同徐浩，其間被讀者陳先生透過「爆相爆片」分享，柏豪賭大細時好肉緊大嗌。


雖然柏豪開騷時不慎傷手指，但無阻佢入賭場試手氣，讀者陳先生喺電話中話：「嗰晚凌晨兩點半，見到佢哋喺度賭大細，呢張枱最低投注額係300蚊，周柏豪輸錢都冇黑面，仲嗌大呀、細呀，好大聲，側邊好多香港人都認得佢，阿公阿婆行埋去頴水吹。」


連詩雅蹺徐浩

讀者仲話連詩雅着短褲仔，頂cap帽向前戴，被賭場啲人叫佢將頂帽轉番向後，之後佢仲蹺住徐浩去玩百家樂。對於被讀者踢爆去賭場，柏豪以短訊回覆：「同同事、樂隊、屋企人一齊喺賭場玩得好開心，贏少少但唔夠請工作人員食飯。賭場同大會都有安排賭場保安保護我哋，所以冇乜嘢擔心。」唔怕影響形象？柏豪話：「唔介意，公眾地方，唔使大驚小怪。」