小背心現真身許靖韻：冇樣多人留意咗

【蘋果日報】網絡歌手小背心，前晚就搞咗個《小背心- REAL TIME Music Live》音樂會，一直以嚟小背心都冇出個樣，好多網民都好想知佢嘅真身，而喺前晚嘅音樂會，佢就除低面具，露出咗真面目，原來佢就係英皇歌手許靖韻。
許靖韻13年簽英皇，但一直以嚟都唔係好紅，最知名都係叫佢翻版泳兒，後來佢以唔出樣唱歌嘅方法，開咗小背心呢個facebook專頁，仲好受歡迎。
許靖韻接受《蘋果》訪問，講到呢個音樂會，佢就話：「今晚好開心，冇諗過有咁多人嚟睇，小背心呢一件事其實好驚喜，因為半年前開呢個page嘅時候，冇諗過可以開到呢個音樂會，所以好意外。」佢又話要觀眾企兩個鐘，但一個觀眾都冇走，佢都好感動。不過許靖韻對今次嘅音樂會都有少少遺憾，因為佢媽媽有事入咗醫院嚟唔到睇，佢希望以後每一次音樂會佢媽媽都可以嚟睇。
講到點解會有小背心，佢就話：「其實一直都有拍片放上youtube，但唔係好大迴響，都唔係好多人留意許靖韻，咁啱有一次唱一首歌睇唔到個樣，發現原來冇樣多咗好多人留意，嗰晚就開咗一個新嘅channel叫小背心，因為嗰晚就着咗小背心。」
之後許靖韻就發現冇咗自己個樣，反應唔錯，不過佢就話唔係賣弄身材，佢話：「因為我都唔係好好身材，一開頭我只係諗住唔出樣，冇諗過要大家留意身材，都係想以音樂為主。」