點都要成雙成對宋仲基學新娘喬妹戴龍鳳鈪

【蘋果日報】韓國神劇《太陽的後裔》嘅宋仲基同宋慧喬上月31號舉行世紀婚禮，結婚後兩人就到咗西班牙度蜜月，之前韓媒指佢哋會於12日返韓，但現時都未有雙宋回國嘅消息，唔知佢哋係唔係打算延長蜜月之旅呢？
而早前雙宋婚禮當日戴住龍鳳鈪嘅相流出，由於韓國婚禮冇送贈新娘子龍鳳鈪嘅傳統，所以外界都推測係曾經同喬妹合作電影《太平輪》嘅吳宇森導演送畀雙宋嘅結婚禮物，事關中國人鐘意送金畀新人寓意吉祥、喜慶，不過及後又有微博用戶澄清該對龍鳳鈪由導演王家衛所送。
無論邊位導演送畀雙宋都好，睇雙宋表情都知道佢哋收到呢份禮物時就相當開心，仲即刻戴上手，不過睇真啲，平日我哋去婚禮喜宴嘅話，明明龍鳳鈪都應該係新娘子喬妹戴上，但估計雙宋唔知呢個傳統，所以宋仲基亦湊熱鬧，戴埋一份。網民睇到宋仲基嘅舉動都大讚佢好可愛，認為雙宋覺得呢對鈪就好似婚戒一樣係一對對，所以先會合拍地一齊戴上，有網民亦驚訝宋仲基手腕都唔算好粗，不費吹灰之力就成功戴上龍鳳鈪。