張繼聰拍片囡囡叫爸爸謝安琪：今鋪當你贏

【蘋果日報】自從囡囡張靖（Karina）出咗世之後，身為爹哋嘅張繼聰即刻患上分享症，得閒就喺社交平台分享同Karina嘅相處點滴，睇到囡囡嘅可愛萌樣，又真係好容易俾佢融化！
唔經唔覺，Karina已經8個月大，前晚張繼聰一如過往喺ig上咗條片，本來好溫馨同囡囡喺鏡頭前傾偈，點知講講吓見到阿聰有啲眼泛淚光喎，究竟發生咗乜嘢事呢？
原來係囡囡第一次叫爸爸！喺短片中，阿聰不停教囡囡叫「爸爸」，最初Karina好怕羞成日拎轉面，阿聰教咗好多次都冇晒符，正當佢諗住放棄嘅時候，Karina突然細細聲叫咗「爸爸」，阿聰呆咗一呆之後，忍唔住錫咗Karina一啖，場面溫馨！阿聰留言話：「OMG，我真係...喊咗，第一聲爸爸！」
做阿媽嘅謝安琪，又點可以俾爹哋贏晒，佢都有轉發兼留言：「好啦好啦，咁都俾你影到，今鋪當你贏喇！#見你做嘢咁辛苦今鋪抵你贏啦#全職湊小朋友又何嘗唔辛苦呢#張瞻張靖#Kakaball唔好大細超好嘛#麻煩你聽日叫返一聲媽咪！」