禁奶令一出陳庭欣ig貼圖自切「大奶奶」？

【蘋果日報】前日傳出大台頒布「禁奶令」，圈中好多唔同意見，有傳係因為J2旅遊節目《3日2夜》女主持經常勁晒比堅尼，太「過火」所致。而《3日2夜》仲喺J2播緊，而上一集由陳庭欣（Toby）主持嘅斐濟篇啱啱第一集出街，當中唔少得佢嘅比堅尼演出啦！不過o依家相信好多人關心「禁奶令」一出呢個節目有冇受影響呢？使唔使腰斬呢？
答案係......
如常播出，Toby昨日仲喺IG貼相宣傳《3日2夜》，雖然只係自發性咁喺IG自我宣傳，不過Toby都照跟「禁奶令」做嘢，「大奶奶」不見了，轉咗勁晒佢嘅玉背，張相個「島」疑似係一張橫相被裁走下半截咁……網民紛紛留言畀Toby，仲話：「最後一集，之後冇得睇」、「一定要睇，歷史性既一刻」、「公司限奶令一出，Toby好乖只露膊頭」……唉。
之後Toby接受傳媒訪問時，就澄清謂張相冇裁剪過，本身係影唔到咪咪嘅，而且張相由導演幫佢操刀影，無花無假。Toby笑稱：「大家都太敏感喇！」咁都好啲，即係以後睇Toby個ig，係仍然有「大奶奶」睇嘅……
不過節目入面有冇剪走晒比堅尼環節，就真係等星期六（18日）節目出街先知喇。