港姐真係要着潛水衣？鄭嘉穎：好期待睇明年會點

【蘋果日報】鄭嘉穎前晚到銅鑼灣出席電影《L風暴》嘅煞科宴，提到該片計劃開拍第四輯？嘉穎就話都有聽黃百鳴提過，但詳情等正式公佈。問佢會唔會推薦女友陳凱琳參演？嘉穎話：「佢工作多到不得了，電影、電視同活動，有麝自然香唔使我講。」
對於女友之前被讀者報料指去日本登機時享有特權唔使排隊一事，嘉穎話覺得幾好笑：「爆料嗰位小姐應該分清楚特權同消費者權利係兩回事，買乜嘢價錢嘅機票咪得到乜嘢權利同服務，每個人都一樣，呢個係航空公司嘅生意決定，要搞清楚先唔好為五百蚊就咁樣。」又話做藝人經常會被誤會，今次係雞毛蒜皮嘅事，經一事長一智。
講到大台發出「禁奶令」，禁止女藝人過份暴露，最開心嘅係咪嘉穎？佢話：「點解咁講？我都係觀眾，大家豈不是少咗嘢睇？」不過佢覺得嗰個係合家歡時段，認為決定正確：「但希望唔好似秋生話港姐要着潛水衣咁，我都好期待睇明年港姐會點。」