同林盛斌世紀之吻錫到面都歪馬明：我都O晒嘴

【蘋果日報】每年大台台慶都有趣劇，今年都唔例外。全晚嘅高潮落咗喺阿Bob(林盛斌)同馬國明身上，佢哋兩個扮演《上海灘》嘅許文強和馮程程，阿Bob問點馬明個樣咁殘，反而丁力(呂良偉)個樣冇變過，馬明摸住阿Bob個胸：「我每晚都要揸的士嘛，我好似佢咁有錢，都可以似佢咁。」點知到臨走嗰陣，林曉峰出招整蠱佢哋，結果佢哋嚟咗個世紀之吻，唔止嚇到馬明彈開，台下嘅嘉賓都好嘩然。
完騷後馬明接受訪問，問到同阿Bob意外咀嘴嘅環節，咁大個仔第一次錫男仔嘅馬明：「冇心理準備，好驚，你話平時拍戲你睇過劇本有心理準備，啱啱突然被阿Lo（林曉峰）拍埋去，不過阿Bob個嘴唇都夠厚嘅。」好玩得嘅馬明仲叫記者得閒可以試下，記者就話啱啱黃心穎睇到O晒嘴，會唔會驚佢呷醋，馬國明就話「正常反應嚟嘅，我都O晒嘴啦。」