華仔復出紅館個唱申明年聖誕檔

【蘋果日報】劉德華昨晚精神奕奕現身尖沙嘴聖誕亮燈活動，吸引大批市民圍觀，最令人興奮是華仔透露計劃入紙申請明年紅館聖誕檔期。今年1月，華仔在泰國拍廣告不慎墮馬受傷，原定今年舉行的紅館跨年演唱會及內地演唱會全部煞停。
不會外遊
華仔昨晚在台上接受司儀訪問，就表示今年的聖誕願望，是入紙申請明年聖誕紅館檔期，台下即傳來熱烈歡呼聲，華仔隨即講笑：「我講吓㗎咋，大家又信呀？」華仔又說原定聖誕有工作，但今年有驚喜，即是受傷，所以有變動，他說：「有時間吉咗，會接多啲公開活動，等大家見到我真係完全康復。」
問到昨晚活動，大會是否真要求他騎馬出場？華仔說只是講笑：「但之前真係有騎馬出場，但都唔記得，可能跌一跌唔記得咗！」華仔又指今年聖誕不會外遊，因機票太貴。記者笑他都怕貴？華仔說：「賺錢都唔會亂用，可能會喺屋企搞小型party。」他又說不會準備禮物給囡囡，但囡囡通常趁節日會畫畫送給他。
研究歌藝
談到明年聖誕紅館檔期，華仔受訪時說：「想試吓，所有嘢未諗，如果得，想喺香港先，但香港騷係自己公司搞，啲期可以就吓，但內地嗰啲真係債主，所以都要睇檔期同埋準備成點。」至於會否減少在演唱會上做高難度動作？他說：「做能力範圍以內嘅事，以前鍾意紮紮跳，依家唔得喇，所以要研究吓歌藝，靠樣咁多年，終於要靠歌藝，可能呢年要學吓唱歌。」
同場的歐陽妙芝表示今年聖誕不會外遊，因囝囝有芭蕾舞表演，鄧鉅明昨晚未有和太太同行，他笑指太太知道現場靚女多，故讓他一個人來，說罷又隨即隔空冧太太說：「當然佢喺我心中係最靚啦！」
採訪：王連連
攝影：葉君海