何守信無緣上EYT竟然關汪阿姐事

【蘋果日報】無綫為慶祝50周年台慶，上星期就大鑼大鼓咁重組皇牌節目《歡樂今宵》(EYT)，一連5晚喺兩線劇集後播放《綜藝精彩50年我愛EYT》，每晚都會請唔同嘉賓做LIVE，好多EYT嘅老友記都好俾面咁出席同大家歡歡樂樂、笑笑談談咁癲番一晚。但有報道指何守信(何B)卻唔能夠亮相該節目，原因係關一個人事，就係同樣今年入行50年嘅汪明荃。
早於70年代阿姐同何B各有一段美滿婚姻，然而佢哋因為合作而日久生情，就係咁有傳佢哋各自離婚，發展地下情，當年都係轟動㗎。奈何男方經常傳緋聞，搞到阿姐嬲豬，經常鬧交，戀情一直拖拖拉拉，最後就因為何B移民而告終，有指當時阿姐為此事而好嬲何B。報道指今次EYT重組，未有搵何B，全因有高層擔心會觸動到阿姐，所以就放棄咗邀請何B。
報道中亦有搵到當事人何B回應，問到係咪因為阿姐而冇機會做番EYT，何B就好坦白話呢啲傳聞大家當然會咁諗，笑言自己無所謂。佢仲話其實同阿姐早於2008年已經冰釋前嫌，何B話當年回巢大台拍處境劇《畢打自己人》時，就見過阿姐，當時大家仲有傾偈。至於係咪傳聞中因為阿姐而冇得做《我愛EYT》，何B就話無論係搞手曾志偉，抑或余詠珊都冇正式邀請過佢，只係透過其他人同佢講過，但何B就話自己冇興趣返幕前，兼且當時佢都返咗鄉下，冇時間出席。