【馮仁昭四圍超】胡楓86歲開騷學友：唔好丟架

【蘋果日報】胡楓（修哥）明年2月喺紅館開兩場「86破晒紀錄」演唱會，噚日修哥喺九展開記招，撐場嘉賓有羅蘭、森森等，一班朋友仲拍片祝賀，契仔張學友話：「契爺啟發我哋，只要生活檢點，健康一啲，可以唱好耐歌。多謝契爺，努力啲，唔好丟架！」多年老友蕭芳芳就錄聲話修哥有四得：「食得、唱得、跳得、講得。」
請嘉賓怕醜
問修哥會唔會請齊其他三個小生，佢話：「今次活動，跑步練氣，兩場都係做份內事，我乜都唔會理，面皮好薄，乜人我都唔會叫。雖然破咗最大年紀開騷紀錄，86歲係大件事，但契仔契女叫咗好多次，再叫人唔好意思，我樣樣唔怕醜，請嘉賓會面紅。」
修哥又拒絕騷肌：「都86歲，邊有肌肉？但想啲肉實啲。」講到四個小生合體，佢話：「我梗係想成班朋友嚟，曾江、謝賢呢兩個識咗60年，好唔簡單，佢哋後生都成日鬥嘴。」
撰文：馮仁昭