被狗咬面要停工姚子羚喊住攞獎叫支持領養

【蘋果日報】姚子羚憑《同盟》拎咗TVB馬來西亞星光薈萃嘅最喜愛TVB女配角，子羚上台之前就攬住拍檔陳山聰，佢都怕自己眼淺，驚會喊出嚟，多謝佢啲姊妹，感謝拍檔陳山聰，「冇你冇Kate」，講講下都係忍唔住喊，呢一年係姚子羚好難忘嘅一年，去年被所領養嘅唐狗「通仔」咬傷塊面，有段時間拍唔到劇，停工幾個月，嗰時每日照鏡見到條疤痕，覺得係一個經歷，希望大家唔好放棄領養動物，亦唔好棄養。
子羚又多謝男友「的士邦」鄭子邦，子羚覺得要學識感恩，活在當下，因為人生無常，喺台下嘅朋友陳山聰、胡定欣同胡蓓蔚聽到都忍唔住喊出嚟。
子羚同龔嘉欣上年喺深水埗發現唐狗「通仔」，搵咗幾個月都冇人領養，如果冇人要就可能俾人拎去人道毀滅，最終由子羚領養「通仔」。