新聞類別
財經
詳情#
【明報專訊】臨近年尾，小琴枱面嘅座枱月曆都要換新裝。芸芸機構之中，小琴就揀咗用中銀香港（2388）嘅兔仔生肖月曆，無他嘅，貪佢同小琴一樣夠可愛囉，物似主人型呀，哈哈！
原來中銀呢幾年都係搵同一個設計師韓秉華做月曆設計，仲巴閉到由2006年開始，年年憑住月曆設計攞到啲國際設計大獎！兔仔代表可愛溫馴，機靈活潑，明年既然係兔年，設計師亦順理成章用返拿手戲生肖做主題，每個月份背後都整咗啲半立體兔仔，切合每個月份嘅節日，例如4月復活節就係復活蛋同復活兔，9月中秋節就有兔仔燈籠，最搞鬼就係2月農曆新年化身變成招財兔。呢款月曆仲要係限量版呢！
其實小琴同一班記者朋友年年都收到好多月曆，揀用邊一款都頭痕，除咗睇佢可唔可愛，實用性都係其中一個重要考慮因素，好似瑞銀UBS出嘅月曆，最大賣點係詳列香港期指結算日、美國議息日等重要日子，就好受財經記者歡迎喇！
回應 (0)
