黃秋生ChefNic上身起勢「掃」掟筆嗰下係精髓

【蘋果日報】謝霆鋒日前去咗澳門，同6位國際名廚參加米芝蓮晚宴，當晚霆鋒負責炮製兩個甜品「玫瑰泡芙及荔枝啫喱」同「玫瑰花瓣及香芹籽麵包條」。因為要一次過預備600個甜品，所以霆鋒更提早到澳門做準備，真係誠意十足。
晚宴當晚，霆鋒當然要露番兩吓身手，畀大家睇吓呢位新晉廚神嘅功架。霆鋒就喺現場替甜品示範吓手唧朱古力，咪睇呢啲係手板眼見功夫，見到佢紥行馬步，「手起刀落」咁起勢唧，唧到一枱都係，咁一定唔會係自己抹番啦。最犀利仲係霆鋒搞到自己一褲都係，有時真係忍唔住笑。
霆鋒呢招起勢唧，亦即時喺各大社交網絡洗版，成為大家茶餘飯後嘅話題。昨早對食都向來有研究嘅黃秋生就喺fb上載咗一段短片，留言「耐人尋味」。片中見到秋生雙手都係起勢咁郁，睇落同霆鋒嘅唧花技術有番咁上下，之但係佢就唔係整甜品，而係手持化妝掃，同一個穿上廚師服男性朋友化妝。秋生三兩下手勢就幫男友人化好個妝，而最後鏡頭就影住男友人，佢就做咗一個「耐人尋味」嘅表情，表情同秋生嘅留言非常脗合，咁其實有乜嘢咁耐人尋味呢，有興趣嘅觀眾同讀者們，大家不妨諗諗，但係猜中冇獎，完...
到中午，霆鋒嘅fb就上載咗為晚宴準備甜品嘅片，仲留言「如果咁都唔明，我就無計了。」咦...霆鋒係同邊個講呢！？大家又估吓吖，照舊猜中冇獎。