投資「重慶站」 一鋪勁賺數億

【明報專訊】「我一定要有得賺先會入市」，紀寶指自己做開賭船生意，多多少少受到影響，明白莊家易贏，所以入市之前會計算清楚，並會抱長線投資心態，所以多年來幾乎無蝕過，即使跌市時都以平租形式租出，「守住」物業。

98年經歷大跌市，亦有失敗過，「當年跟住個勢去，乜都買，仲大大件（大銀碼），金融風暴後，帳面唔見好多（錢）。」他表示，當年購入九龍塘兩幅地皮，面積逾2萬方呎，構思建會所及時鐘酒店，奈何遇上經濟低迷、樓市大滑，帳面損失慘重。「不過最後守得到，連買地及興建，計落都唔使輸。」最終以超過1億元沽出，上址目前是一間幼稚園。

幾千萬改裝重整 轉手賺大錢

回顧多年來的買賣投資，紀寶稱幾乎全部有賺，最為人熟悉的，可謂將商舖拆售潮推向高峰的尖沙嘴重慶站商場。「當年流行劏舖，於是同幾個朋友夾份購入上址，用咗幾千萬改裝重整，賺咗大錢！」據悉，他2005年時售出逾三成舖位（逾300個），呎租最高達3萬元，並大賺數億元。

10年物業投資 僅「輸」1次

10年來的物業投資歷程，紀寶指僅「輸」過一次，但嚴格來說也不算輸，「當年買咗山頂布力徑計劃搬去住，之後遇到97年金融風暴，個市跌咗好多，當時想賣咗自住的銅鑼灣大寶閣搬上山頂，不過老闆睇中布力徑，於是割愛賣畀佢。」

他說，當年其實有能力渡過樓市低潮，大可不賣，不過老闆喜歡，「係賣（老闆與下屬間嘅）感情」，於是不惜蝕讓幾千萬元沽出。紀寶曾經營富城及富都夜總會，賣盤後擔任亞洲郵輪行政顧問。